Comune: Modena
Provincia: Modena
Edicolante: GIULIANO BARBIERI Mercato Albinelli
“Sgnor Giuliano, a’m dal ……? Mo vèh chi gh’è ! Mo et te Zelmira ?”
“Ciao Rosanna! Stèt bein? Giuliano, a voi Novella e al Curèr d’la Sira .
Et sintì Rosanna che brot lavor? La fiola d’la Cesira l’è armèsa in cinta
la s’è inamurèda dal fiol d’la Carolina. Un mèz droghè. Un boun da gninta!”
“E te Zelmira, sèt propria gninta dal pràtich d’la muiera ed Panighein l’inzgnèr ?”
“Beh mo! Sa dìt ? An voi savèr ed petàgled! Giuliano, dam Stop e Chi. Per piasèr!”
Adio Zelmira! At salùt Rosanna!
Satt’vos un vciàtt , stricànd un òcc’:” Giuliano, am dèt un giurnalein ?
Mo dai! A n’fèr la vècia! …Dam al sòlit. Qual col foto del dunlein !”
La sgnora Cleonice ,vadva ed Pirein padròun d’un bar in riva a Sàccia
“Mi dia Men, Novella 2000, Pley Boy…..e sù! Non faccia quella faccia!”
“Giuliano, sperànd che al me Alfunsein, finalmein, a st’ora al sia desdè
A-gh port a ca i giurnè so preferi: Famia Cristiana, al Manifést e l’Unitè.”
Un nòn al guèrda in dal Carlein meintèr so anvo in caruzeina al fa la plènga
al gira tott i foi , al fa un suspìr..: “CHE CUL ! Anch per inco an g’sun mènga!”
Jusfein:” Me,dap un piàt ed taiadèl, a léz al me gionèl e’na gazza o do d’nusein.
A dagh n’ucèda al Modna, po’a fagh un bèl runfot. Còmed, pugiè al me cuscein.”
Un sgnor :”Vò gi por qual ca vli! Me a léz in Gugol el nuvitè dal dè e d’la nòt
a séder còmed in d’la me pultrouna a impèr el nuvitè: i amor, el guèr e i taramòt.”
Giuliano :”Sal sa a-i ho da dir, al me sgnor? Am scusa bein ! Ed’tasèr an sun pò mènga bòun
Lézer, seinza chèrta e seinza l’udor d’la stampa, l’è come magnèr d’un pam sol al rusgoun ! –
