Comune: Carpi
Provincia: Modena
Edicolante: Federico Massari Piazza Martiri n° 11
Mè a sun neda,
tant teimp fa, in periferia
e, a chi teimp,
l’edicola l’an gh’era mia,
l’agiint la s’organiseeva
e i poch giornee,
a la dmènga, in dal cà as purteva.
Po è rivee l’edicola, l’edicola cartoleria,
l’edicola merceria e cartolibreria.
Incoo, al gl’edicoli al s’in trasfurmedi,
oltre i tant giornee, in bein organizedi,
a gh’è de tùtt per infurmeer o sbraghireer.
Vliiv impareer a feer da magneer,
canteer, suneer o ricameer?
In edicola al psii cateer!
Vliiv feer colesioun d’arloj,
ed pgnatèin, ed faciutèin,
ed machinèini, moto o trinèin
o vliiv di film da guardeer?
In edicola al psii cateer!
Vliiv un C.D da sculteer,
un lìbèr da regaleer,
un coors ed lìngui da impareer
o un calendaari da consulteer?
In edicola al psii cateer!
Anch i mee edicolaant i s’iin
modernisee, informatisee,
basta dmandeeregh queel,
che t’viin cuntintee.
In tiip simpatich,
i faan luntera doo ciacri in cumpagnia.
In anch apasionee ed fotografia,
avenimeint e personaag
in ghe scaapen mia.
Quista le l’edicola dal boun umoor,
che, doop un boun cafè,
al giorneel lee giùst toor.
Quìsta lee n’edicola ed raasa.
Quista lee l’edicola ed la mee piaasa.
