Comune: Mirandola
Provincia: Modena
Edicolante: Daniela Vergnani, Via Valli 650/652, San Martino Spino (Mo)
In di paes pìcui l’edicola l’è l’umbrìgul dal mond. Chi a la matina prest a s’ impara tutt. I fatt bei e brutt, chi sta ben, chi sta mal, chi è andà a l’usdal, chi ha impinì al sest, chi a forsa ad gratar al g’ha di guai parchè al na vins mai.
Basta lezar la locandina fora par capir cus’è sucess: n’incident, i ladar chi va dapartutt, al terorista dla giurnada, i risultat d’ielesiòn, chi porta in bisaca na feta ad cajon…As bateza cusa cumbina la casta, che Dio sol al sa cusa las costa e cla sembra ‘na cosca.
Se ad va dentar, at dirò di più: al copertini di setimanai i’ è tuti un scandul e un peteguless. I giurnai i’è quasi tutt cumpagn, cmé al pen, is magna par na giurnada sola e po’ i’è sol bon pr’iscartussar o pral bidon dla carta e dal carton che a gh’è in fond a la strada o al caradòn.
Na volta, quend a s’iran puvrett i druvavan pr’impisar la stua o al cesso, clira lunten da l’abitasion, par puliras al cul (parchè, al contrari d’adesa, as friziva in cà e as cagava fora), pr’astupar al sfesi d’iarmari e di cassòn, pr’ iscartussar i salam o par far dal palòtuli moii o di paralum, o la materia prima dla cartapesta a scula o pral carneval, di curianduii o di faciott.
In d’iedicoli adess con la roba stampada as vend arloii, ceramichi, modelìn, libar, roba ad vidar, bicìar, cd, caseti, calendari, santìn, madòni, quadrett, piatt, tasìni, suldadìn, valis ad curtei, ris al tonno, verdura tridada seca, borsi, bursin, bursei, burseti e burson, sugacavii, stemp da torti, bigiotteria, peni, mineraii, matunsìn, corassadi, coli, cremi, shampoo, velieri, moti, barchi, robot, dinosauri a pcòn, con i quali a vegn regalà dispense, giurnai e riviste. Minga viceversa, cuma cardem…
Al robi più strani che ho catà in abbinament? Preservativ, spazulin pri fons, pann da lett, vibrosaggiadòr, majon, manteii, scatuli da spaghett, dad pral brod, baby doll, perizoma ross da purtar cmè portafortuna e par cuccar l’ultim dì dl’ann, vascheti ad ris bela buiù, runcheti, barchi, castei, muturìn, reoplen, elicottar, droni (smuntà, ma chi và dabòn!), statui ad sent e madoni, faci dal Papa, insegni scadudi, ruzari, bacheti magiche, pugnai e spadi, la corasada Bismark, la corasada Roma, machini di carabiniar, dent ad dinosauro autentic, pcunzin ad meteoriti, insett (ench velenos), ceramichi firmadi Picasso, borsi par l’acqua calda, cavalett da pitor. Quasi tuta roba made in Cina.
L’edicola dal me paes, ad San Martin da Bass, l’è pasada da Ivaldo a la Chiara, e dop a la Daniela.
L’è averta tutt i dì, l’ira averta ench i dì dal teremot e dla tromba d’aria. Prima, durante e dopa…
L’ira pina al 20 ad magg dal domiladodaz.
Mi a s’ira in campagna, par scrivar na poesia:
Quando sono in Valle
e tu sei con me
sento vibrare forte il cuore.
………………………………
…Ma stavolta è stato il terremoto…
Al 3 ad magg dal domilatredaz la tromba d’aria. In dl’edicola a vulava i mur, i giurnai e i zugatui…Un qualchidun al s’è cagà adoss, ma ninsun dal so post al s’è moss.
Adess che tutt l’è sta giustà as torna a l’edicola cmè in processiòn. A lez al locandini, am gira i maròn. Mai na nutisia clam piasa dabòn.
