Comune: Modena
Provincia: Modena
Edicolante: Giuliano, Mercato via Albinelli
La per ‘na baracheina da du pièe
Ma la cambia la ghégna tòt i dèe
Col locandein’in màstr’apariscent
D’atirer l’atenzioun di sòo client
Al giornaler deinter al sgabuzein
Al vànd quotidian e giornalein
Bigliàt dal Bus e leber important
Ogni grazia ed Dio per servir tòt quant
Calendari, rivesti illustredi
In coperteina dàn strampaledi
El fan vàder tòt : umbreghel panza
Quaciand sol cal poc, per la creanza
Et trov’ al gratta-vinci, per ‘dvinter sgnor
E tòt l’oroscopo per i problema ‘d cor
El figureini da fer tanti colezioun
Persin libràt ch’insàgnen a fer clazioun
E in cal rivesti cal màt bein in vésta
Quant sbagianedi screv i giornalesta
Ona l’ha pers l’ambros, un’eter s’è divis
Pò dap igh màten ca gh’era sol d’avis
Anch per la cronaca igh chelchen la man
Si vàden ‘a cumàta, i screven reoplan
per tòt i fat, i fan dl’esagerazioun
per dòo gàz apeina i disen aluvioun
Soquant scritor is-seinten : al “Pedr’Etern”
al Paradis, i al fan dvinter l’Inferen
ma turnam al noster amigh giornaler
che da lò del cosi, a duam imparer
A la mateina as leva ‘d bon’ora
Per rendr’i vecc, chi nov al màt fora
Al vànd la sòo merce in ‘na manera
Che quel ca gh’è scrét al per propria vera!!!!!
